அடடே.. ஆளுநர் ரவி பொறுப்பேற்றதும் முதல்வர் ஸ்டாலின் கொடுத்த 2 புத்தகங்களை கவனித்தீர்களா? – Oneindia Tamil

ராஜ் பவனில் இன்று நடைபெற்ற புதிய ஆளுநர் பதவியேற்பு விழாவின் போது முதலமைச்சர், ஆளுநருக்கு இரு புத்தகங்களை பரிசாக வழங்கி பொன்னாடை பரிசளித்தார். ஆளுநரின் மனைவிக்கும் பொன்னாடை வழங்கி கவுரவித்தார்.

பொதுவாக எந்த ஒரு முக்கிய பிரமுகர்களை சந்தித்தாலும் முதலமைச்சர் ஸ்டாலின் புத்தகங்களை பரிசாக வழங்கி வருகிறார். முதலமைச்சராக பொறுப்பேற்ற பிறகு முதல் டெல்லி பயணத்தின்போது பிரதமர் நரேந்திர மோடி மற்றும் சோனியா காந்தி ஆகியோரை சந்தித்தபோதும் புத்தகங்களை பரிசாக வழங்கினார்.

பிரதமர் நரேந்திர மோடியை சந்தித்த போது செம்மொழி சிற்பிகள் என்ற புத்தகத்தை அவர் பரிசாக வழங்கியிருந்தார். தமிழ் மொழியின் சிறப்பு காரணமாக 100 தமிழ் அறிஞர்களின் வாழ்க்கை வரலாறு, அவர்கள் தமிழுக்கு ஆற்றிய தொண்டு, அவர்களின் உருவ சித்திரம் ஆகியவை இந்த நூலில் அடங்கியிருந்தன. இதேபோன்று, சோனியா காந்தியை சந்தித்த போது Journey Of A Civilization Indus To Vaigai என்ற புத்தகத்தை பரிசாக வழங்கினார் ஸ்டாலின். தமிழில் ஐஏஎஸ் தேர்வு எழுதி ஒடிசா மாநிலத்தின் தலைமைச் செயலாளர் உள்ளிட்ட பல்வேறு முக்கிய பொறுப்புகளை வகித்த ஆர் பாலகிருஷ்ணன் ஐஏஎஸ், இந்தப் புத்தகத்தை எழுதியிருந்தார்.

இப்போது தமிழக ஆளுநராக பதவி ஏற்றுள்ள ரவிக்கு, கீழடி என்ற புத்தகத்தையும் மெட்ராஸ் என்ற முத்தையாவால் திருத்தம் செய்யப்பட்ட புத்தகத்தையும் பரிசாக வழங்கி இருக்கிறார் ஸ்டாலின். இரண்டுமே ஆங்கிலத்தில் உள்ள புத்தகங்களாகும். யாருக்கு புத்தகங்கள் கொடுத்தாலும் அதில் தமிழ் கலாச்சாரம் முன்னே வந்து நிற்குமாறு உள்ள புத்தகங்களை தேர்ந்தெடுத்து அவர் வழங்குவது கவனிக்கத்தக்க அம்சமாக இருக்கிறது.

புத்தக தேர்வு பின்னணியில் முதல்வர் மட்டுமே கிடையாதாம். அவரின் சிறப்பு செயலாளர் மற்றும் முன்னாள் பள்ளிக்கல்வித்துறை முதன்மை செயலாளரான உதயசந்திரன் ஐஏஎஸ் இருப்பதாகவும் கூறுகிறார்கள் விவரம் அறிந்தவர்கள்.