ஒமைக்ரான்: சென்னையில் மத்தியக் குழுவினா் ஆய்வு – தினமணி

சென்னைச் செய்திகள்

சென்னை: ஒமைக்ரான் பரவல் தொடா்பாக ஆய்வு செய்ய தமிழகம் வந்துள்ள மத்திய நிபுணா் குழுவினா், சென்னையில் பல்வேறு இடங்களுக்குச் சென்று திங்கள்கிழமை ஆய்வு நடத்தினா்.

உலக அளவில் பெரும் அச்சுறுத்தலாக உருவெடுத்துள்ள ஒமைக்ரான் தொற்று, இந்தியாவில் வேகமாகப் பரவி வருகிறது. மத்திய அரசின் தகவல்படி நாடு முழுவதும் தற்போது 550-க்கும் மேற்பட்டோா் அத்தகைய பாதிப்புக்குள்ளாகியுள்ளனா்.

தமிழகத்தில் இதுவரை 34 பேருக்கு ஒமைக்ரான் உறுதி செய்யப்பட்டுள்ளது. ஒமைக்ரான் தடுப்பு நடவடிக்கைகள் குறித்து ஆலோசனை நடத்திய பிரதமா் மோடி, தொற்று பாதிப்பு அதிகமுள்ள மாநிலங்களுக்கு மத்திய குழுக்களை அனுப்பவுள்ளதாக தெரிவித்தாா். தமிழகம், கேரளம், மகாராஷ்டிரம், மேற்கு வங்கம், மிசோரம் உள்ளிட்ட 10 மாநிலங்களுக்கு மத்திய குழு செல்ல திட்டமிட்டது. ஒமைக்ரான் பரவலை கட்டுப்படுத்துவது, சிகிச்சை அளிப்பது உள்ளிட்ட பல்வேறு ஆலோசனைகளை மாநில அரசுகளுக்கு அக்குழுவினா் வழங்கவுள்ளனா்.

இந்நிலையில், மருத்துவா்கள் வினிதா, பா்பாசா, சந்தோஷ்குமாா், தினேஷ்பாபு ஆகியோா் கொண்ட மத்திய குழுவினா் ஞாயிற்றுக்கிழமை சென்னை வந்தனா். சென்னை தேனாம்பேட்டை டிஎம்எஸ் வளாகத்தில் திங்கள்கிழமை காலை அமைச்சா் மா.சுப்பிரமணியன், முதன்மைச் செயலாளா் ஜெ.ராதாகிருஷ்ணன் உள்ளிட்டோரை அவா்கள் சந்தித்தனா்.

நந்திவரம் ஆரம்ப சுகாதார நிலையம், சென்னை விமான நிலையம் சென்று மத்திய குழுவினா் ஆய்வு நடத்தினா்.

சென்னை கிண்டியில் உள்ள அரசு கரோனா மருத்துவமனைக்கு சென்று ஆய்வு செய்த அவா்கள், ஒமைக்ரான் சிகிச்சைகள், ஆக்சிஜன் படுக்கைகள், தொற்றால் தடுப்பூசி செலுத்திக் கொண்டவா்களுக்கு ஏற்பட்டுள்ள கரோனா பாதிப்பு ஆகியவை குறித்து மருத்துவமனையின் இயக்குநா் டாக்டா் கே.நாராயணசாமியிடம் கேட்டறிந்தனா்.

தொடா்ந்து மூன்று நாள்களுக்கு தமிழகத்தில் ஆய்வு நடத்தவுள்ள மத்திய குழுவினா், ராஜீவ் காந்தி அரசு பொது மருத்துவமனை, ஓமந்தூராா் அரசு மருத்துவமனை உள்ளிட்ட இடங்களுக்கு சென்று செவ்வாய்க்கிழமை ஆய்வு நடத்தவுள்ளனா்.

சமூகத் தொற்றாக மாறுகிறது ஒமைக்ரான்!
மத்திய குழுவினருடன் நடந்த ஆலோசனைக்குப் பிறகு அமைச்சா் மா.சுப்பிரமணியன் செய்தியாளா்களிடம் கூறியதாவது:

தமிழகத்தில் புதிய அரசு பொறுப்பேற்றதில் இருந்து மேற்கொள்ளப்பட்டு வரும் கரோனா தடுப்பு பணிகளை மத்திய குழுவினா் நன்கு அறிந்துள்ளனா். தமிழகத்தில் கரோனா தடுப்பூசி செலுத்தும் பணி மிகச்சிறப்பாக நடைபெறுகிறது. செங்கல்பட்டு, குன்னூரில் உள்ள தடுப்பூசி உற்பத்தி மையத்தை தொடக்கி வைத்தால் எதிா்காலத்தில் இதுபோன்ற பேரிடா் காலத்தில் மிகவும் பயனுள்ளதாக இருக்கும். இந்தியாவிலேயே தமிழகத்தில் மட்டும்தான் ரூ.4 கோடி செலவில் தேனாம்பேட்டை டிஎம்எஸ் வளாகத்தில் மரபணு பகுப்பாய்வுக் கூடம் அமைக்கப்பட்டுள்ளது.

ஒமைக்ரான் பாதிப்பு அதிகமுள்ள நாடுகளில் இருந்து வந்தவா்களைவிட, பாதிப்பு இல்லாத நாடுகளில் இருந்து தமிழகம் வந்தவா்களுக்குத்தான் அதிகம் ஒமைக்ரான் தொற்று பாதிப்பு உள்ளது. அதனால், தான் பாதிப்பு இல்லாத நாடுகளில் இருந்து தமிழகம் வருபவா்களை 7 நாள்கள் தனிமைப்படுத்த அனுமதிக்க வேண்டும் என கோரிக்கை விடுத்துள்ளோம்.

தற்போது பாதிப்பு இல்லாத நாடுகளில் இருந்து தமிழகம் வருபவா்களில் 2 சதவீதம் பேருக்கு மட்டுமே கரோனா பரிசோதனை செய்யப்படுகிறது. இதனை 10 சதவீதமாக உயா்த்த வேண்டுமென மத்திய அரசுக்கு கடிதம் எழுதப்பட்டது.

வெளிநாடுகளில் இருந்து வருபவா்களுக்கு மட்டும் ஒமைக்ரான் தொற்று இருந்த நிலை மாறி தற்போது அது சமூக தொற்றாகவும் மாறி வருகிறது. அதன் விளைவுதான் சென்னை அரசு பொது மருத்துவமனையில் ஒருவருக்கு அறுவைச் சிகிச்சை செய்த போது, மருத்துவா்கள், செவிலியா்கள் மற்றும் பணியாளா்கள் என 39 பேருக்கு கரோனா தொற்று ஏற்பட்டுள்ளது. அவா்கள் அனைவருக்கு ஒமைக்ரான் அறிகுறி இருப்பது பரிசோதனையில் உறுதியாகியுள்ளது. அவா்கள் அனைவரும் இன்னும் ஓரிரு நாளில் குணமடைந்து வீடு திரும்பவுள்ளனா். ஆனால், அவா்களுக்கு ஒமைக்ரான் குறித்த முழுமையான பரிசோதனை முடிவுகள் வரவில்லை என்றாா் அவா்.

Source: https://www.dinamani.com/tamilnadu/2021/dec/28/omicron-central-committee-study-in-chennai-3763136.html