அடல் தரவரிசை பட்டியலில் நம்பர் 1 இடத்தை பிடித்த IIT மெட்ராஸ்..! – Tamil Samayam

அடல் தரவரிசை 2021 இல், IIT மெட்ராஸ் தொடர்ந்து மூன்றாவது ஆண்டாக தொழில்நுட்ப பிரிவில் இந்தியாவின் மிகவும் புதுமையான கல்வி நிறுவனமாக அங்கீகரிக்கப்பட்டுள்ளது. இதைத் தொடர்ந்து IIT பாம்பே, IIT டெல்லி, IIT கான்பூர், IIT ரூர்க்கி, இந்திய அறிவியல் நிறுவனம் (IISC), IIT ஹைதராபாத் மற்றும் IIT காரக்பூர் உள்ளிட்டவை முதல் பத்து இடங்களை பிடித்துள்ளது.

மத்திய அரசின் நிதியுதவி பெறும் தொழில்நுட்ப நிறுவனங்களில், IIT மெட்ராஸ் புத்தாக்கம் நிறைந்த கல்வி நிறுவனமாக திகழ்வதாக அங்கீகரிக்கப்பட்டுள்ளது. இந்த ஆண்டு சுமார் 1,438 உயர் கல்வி நிறுவனங்கள் ARIIA தரவரிசைக்கான பதிப்பில் பங்கேற்றது. இதன் தரவரிசைப் பட்டியல் முடிவுகளை மத்திய கல்வித்துறை அமைச்சர் சுபாஸ் சர்க்கார் வெளியிட்டார்.

ARIIA தரவரிசை என்பது, புதுமைகளை ஊக்குவிக்கும் மத்திய கல்வி அமைச்சகத்தின் முன்முயற்சி ஆகும். அதாவது, தொழில்முனைவோர் மேம்பாட்டிற்கான ஆதரவு முதல் புதுமையான கற்றல் முறைகள், அறிவுசார் சொத்து உருவாக்கம், தொழில்நுட்ப பரிமாற்றம் மற்றும் வணிகமயமாக்கல் போன்ற அளவுகளின் அடிப்படையில் தொழில்நுட்ப பல்கலைக்கழகங்கள் மற்றும் கல்லூரிகளை மதிப்பிடுகிறது. இது நமது நாட்டின் முன்னணி கல்வி நிறுவனங்களை சர்வதேச தரவரிசைப் பட்டியலுக்கு தயார்படுத்த உதவும்.

ARIIA தரவரிசையின் மூன்றாவது பதிப்பிலும், IIT மெட்ராஸ் நம்பர் 1 இடத்தை பிடித்துள்ளது. ஐஐடி-மெட்ராஸைத் தொடர்ந்து ஐஐடி பாம்பே, ஐஐடி டெல்லி, ஐடி கான்பூர் மற்றும் ஐஐடி ரூர்க்கி ஆகியவை உள்ளன. பெங்களூருவில் உள்ள இந்திய அறிவியல் கழகம் (IISc) பிரிவில் ஆறாவது இடத்தைப் பிடித்தது.

ARIIA-யின் அதிகாரப்பூர்வ அறிவிப்பின் படி, “பதிவு செய்யப்பட்ட மொத்தம் 3,551 உயர்கல்வி நிறுவனங்களில், 1438 நிறுவனங்கள் (அனைத்து ஐஐடிகள், என்ஐடிகள், ஐஐஎஸ்சி போன்றவை) இந்த தரவரிசை கணக்கீட்டில் பங்கேற்றன. இது இரண்டாம் பதிப்பை விட இரண்டு மடங்கு அதிகமாகும் மற்றும் முதல் பதிப்போடை ஒப்பிடும் போது சுமார் நான்கு மடங்கு அதிகம்” என குறிப்பிட்டுள்ளது.

மாநில மற்றும் பல்கலைக்கழகங்களாக கருதப்படும் தரவரிசையில், பஞ்சாப் பல்கலைக்கழகம் (சண்டிகர்) முதலிடத்தையும், அதைத் தொடர்ந்து டெல்லி தொழில்நுட்ப பல்கலைக்கழகமும், நேதாஜி சுபாஸ் தொழில்நுட்ப பல்கலைக்கழகமும் (டெல்லி) உள்ளன.

அரசு பொறியியல் கல்லூரிகள் பிரிவில், புனேவில் உள்ள பொறியியல் கல்லூரி முதலிடத்திலும், தமிழ்நாட்டின் பிஎஸ்ஜி தொழில்நுட்பக் கல்லூரி, குஜராத்தில் உள்ள எல்டி பொறியியல் கல்லூரி இரண்டாமிடத்திலும் உள்ளன.

தனியார் பல்கலைக்கழக பிரிவில் கலிங்கா இன்ஸ்டிடியூட் ஆப் இன்டஸ்ட்ரியல் டெக்னாலஜி கோர்தா (ஒடிசா) முதலிடம் பிடித்தது. மகாராஷ்டிராவில் உள்ள ஜி எச் ரைசோனி பொறியியல் கல்லூரி மிகவும் புதுமை வாய்ந்த தனியார் கல்லூரியாக அங்கீகரிக்கப்பட்டது.