”நம்ம நார்த் மெட்ராஸ்”… சென்னையின் பூர்வகுடி மக்களும், உழைப்பின் அடையாளமும்! – Tamil Samayam

சென்னைச் செய்திகள்
சென்னை என்றாலே உயர்ந்து நிற்கும் கட்டிடங்களும், வருமானம் கொழிக்கும் ஐடி நிறுவனங்களும், கடற்கரை, தி.நகர், சென்னை சென்ட்ரல், ஏவிஎம் ஸ்டூடியோ போன்ற விஷயங்கள் தான் நியாபகம் வரும். இந்த சென்னையை வளர்த்தெடுக்க முக்கிய காரணமாக இருப்பவர்களை பற்றி பெரிதாக யாருக்கும் நினைவுக்கு வருவதில்லை. ஏனெனில் வட சென்னை என்றாலே லோக்கல் பார்ட்டி, ரவுடி பசங்க, மோசமான ஏரியா என்று தான் பலரும் பேசக் கேட்டிருப்போம். அப்படித்தான் இந்தப் பகுதியில் இருக்கும் மக்களை சித்தரித்து பெரும்பாலான தமிழ் சினிமாக்கள் காண்பித்திருக்கும். அதுவே நம் மனதிலும் பதிந்து போயிருக்கும். ஆனால் உண்மை அதுவல்ல.

சென்னையின் பூர்வகுடிகள் தான் இந்த வட சென்னைவாசிகள். நாம் தான் வட சென்னை என்று அழைத்து வருகிறோம். ஆனால் அந்த மக்கள் ”நார்த் மெட்ராஸ்” என்று தான் இன்றும் அழைக்கின்றனர். அதிகாலை 4 மணிக்கு தொடங்கும் இவர்களின் தினசரி வாழ்க்கை நள்ளிரவு வரை உழைப்பு, உழைப்பு, உழைப்பு என்று தொடர்ந்து கொண்டே இருக்கும். டீக்கடைகளில் டீ குடித்து விட்டு பன்னும், பிஸ்கட்டும் சேர்த்து வயிற்றை நிரப்பி கொண்டு வேலையை தொடங்கிவிடுவர். மாமா, மச்சு, மாப்ள என்று அன்பாக பேசி ஜாலியாக இருந்தாலும், உழைப்பு என்று வந்துவிட்டால் ஈடு இணையே கிடையாது. சும்மா இரண்டு, மூன்று மணி நேரம் செய்து விட்டு ஓய்வெடுத்து கொள்வார்கள் என நினைத்து விட வேண்டாம்.
சென்னை தினம்: திருவிழா கோலத்தில் பெசன்ட் நகர் எலியட்ஸ் கடற்கரை!
உடம்பை கசக்கி பிழியும் அளவிற்கு பல மணி நேரம் இடைவிடாமல் செய்யும் வேலைகளும், அதைச் சார்ந்த தொழிலாளர்களும் இங்கு அதிகம் இருக்கின்றனர். குறிப்பாக பாத்திரங்களுக்கு பாலீஷ் போடும் வேலை, சோப்பு கம்பெனிகள், பருப்பு பொடி கம்பெனிகள், லேத்து பட்டறைகள், இரும்பு சாமான்கள் செய்யும் கடைகள், பார்சல் தகடுகள் போடும் வேலை உள்ளிட்டவை வட சென்னையின் முக்கியமான வேலைகளாக இருக்கின்றன. இப்பகுதியில் ஆட்டோ மொபைல்ஸ், ரப்பர், காட்டன் உள்ளிட்ட நிறுவனங்கள் இருக்கின்றன. வட சென்னை துறைமுகத்தின் மூலம் தான் நிலக்கரி, தானியங்கள், பெட்ரோல் போன்ற பல்வகை பொருட்கள் வந்திறங்கி சென்னைக்கு கொண்டு செல்லப்படுகின்றன.

ஒருவேளை தங்களுக்கு ஏற்ற வேலை இல்லையெனில் வேறு ஏரியாக்களுக்கு சென்று உரிய வேலையை வடசென்னைவாசிகள் தேடிக் கொள்கின்றனர். கிண்டி, அம்பத்தூர், ஆவடி ஆகிய இடங்களில் உள்ள தொழிற்பேட்டைகளில் தற்போது பலரும் வேலை செய்து வருகின்றனர். பெரும்பாலானோர் தினக் கூலி அல்லது வாரக் கூலிக்கு தான் வேலை செய்கின்றனர். இவர்கள் எந்த ஏரியாவாக இருந்தாலும் பிழைத்துக் கொள்ளக் கூடியவர்கள். இல்லையெனில் சுயமாக களமிறங்கி ஏதேனும் தொழில் செய்யத் தொடங்கி விடுவர். அந்த அளவிற்கு திறமை வாய்ந்தவர்கள். இவர்கள் கூலிகளாக வலம் வந்து கொண்டிருக்கையில் இப்பகுதியின் பெருமுதலாளிகளாக வட மாநிலத்தவர்கள் தான் இருக்கின்றனர்.

வட சென்னை உணவுக்கு மிகவும் பிரபலம். பர்மீஸ் உணவு வகைகள், காசிமேடு மீன் மார்க்கெட், ரோட்டு கடை இட்லி என பலவித உணவுகள் கிடைக்கின்றன. இதேபோல் வெளியில் சென்று நண்பர்களோடு விளையாடும் விளையாட்டு என்பது இன்னும் உயிர்ப்போடு இருந்து கொண்டிருப்பது வட சென்னையில் தான் என்று சொல்லலாம். கால்பந்து, பாக்சிங் சாம்பியன்கள் பலரை உருவாக்கிய இடம் வட சென்னை. இதுதவிர கண்ணாமூச்சி, கில்லி, கோலி, கபடி, கோ-கோ, கிரிக்கெட், தடகளம் என லிஸ்ட் பெரிதாகி கொண்டே செல்கிறது. இவ்வளவு சிறப்பு மிக்க வட சென்னையில் பெரிய சிரமத்தை அளித்து வருவது சுகாதாரம். கழிவு நீர் வடிகால்கள், மழைநீர் வடிகால்கள், குப்பைகளை அகற்றுதல் உள்ளிட்ட விஷயங்கள் சரியாக கடைபிடிக்கப்படுவது இல்லை.
கிளாம்பாக்கம்: பஸ் ஸ்டாண்ட் மட்டுமில்ல… கூடவே பெருசா ஒரு சர்ப்ரைஸ்!
இந்த விஷயத்தில் சென்னை மாநகராட்சி அலட்சியம் காட்டி வருவதாக குற்றச்சாட்டு நிலவுகிறது. இதில் ஆட்சிகள் மாறினாலும் காட்சிகள் மாறவில்லை என்று சிலர் கூறுவதை கேட்கலாம். குப்பைகளும், கழிவு நீரும் தேங்கி கிடப்பதால் கொசுக்கள் அதிகம் உற்பத்தியாகி மக்களை வாட்டி வதைக்கிறது. இதனால் பல நோய்கள் ஏற்பட்டு முடக்கி போடும் அளவிற்கு நிலைமை சென்று விடுகிறது. இந்த லிஸ்டில் குடிநீர் வசதியையும் சேர்த்து கொள்ளலாம். போதிய தண்ணீர் வசதி கிடைப்பதில்லை எனச் சொல்லப்படுகிறது. அதுமட்டுமின்றி சுற்றியுள்ள தொழிற்சாலைகளால் தண்ணீர் மாசுபடைந்து கிடைப்பதாகவும் கூறுகின்றனர். இதேபோல் போதிய வீட்டு வசதிகளும் செய்து தரப்பட வேண்டியுள்ளது. சென்னை தினம் என்று ஆண்டுதோறும் பெருமை பேசி கொண்டாட்டத்தில் ஈடுபட்டால் மட்டும் போதாது. வட சென்னையின் வாழ்வாதாரம் மேம்பட வேண்டும். அதற்கு சென்னை மாநகராட்சியும், தமிழக அரசும் நல்ல பல திட்டங்களை செயல்படுத்த வேண்டும்.

Source: https://tamil.samayam.com/latest-news/chennai-news/special-things-about-north-chennai-and-its-people-work-culture-and-sports/articleshow/93692497.cms