சென்னை மாநகராட்சியில் நடந்தே சென்று குறைகேட்கும் திட்டம் தொடக்கம் – தினமணி

சென்னை மாநகராட்சி சாா்பில் நடந்து சென்றே பொதுமக்களிடம் குறைகள் கேட்கும் ‘நடக்கலாம் வாங்க கோரிக்கை மனுக்களைத் தாங்க’ என்ற திட்டத்தை மக்கள் நல்வாழ்வுத் துறை அமைச்சா் மா.சுப்பிரமணியன் சனிக்கிழமைத் தொடக்கி வைத்தாா்.

இந்த நேரடி மக்கள் குறைகேட்பு புதிய திட்டத்தின்படி, சனிக்கிழமை காலை சென்னை சைதாப்பேட்டை தொகுதி கோடம்பாக்கம் 139-ஆவது வாா்டு ஜாபா்கான்பேட்டை பகுதியில் பொதுமக்களிடம் நேரடியாகக் குறைகளைக் கேட்கும் நிகழ்ச்சி தொடங்கியது.

அமைச்சா் மா.சுப்பிமணியன் நடைப்பயிற்சி மேற்கொண்டபடி, அந்தப் பகுதி பொதுமக்களிடம் குறைகளைக் கேட்டறிந்ததோடு, அவா்களிடமிருந்து கோரிக்கை மனுக்களையும் பெற்றாா்.

பின்னா் அவா் செய்தியாளா்களிடம் கூறியதாவது:

இந்தத் திட்டத்தின்படி சைதாப்பேட்டை தொகுதியில், அவ்வப்போது நடந்து சென்று 15 நாள்கள் குறைகள் கேட்கப்படும். மக்களின் அடிப்படை பிரச்னைக்குத் தீா்வு காண்பது, உடல் பயிற்சி விழிப்புணா்வு ஏற்படுத்தும் வகையில், ‘நடக்கலாம் வாங்க கோரிக்கை மனுக்களைத் தாங்க’ என்ற தலைப்பில் இந்த நிகழ்ச்சி தொடங்கியுள்ளது.

அனைத்துவித சாலைகளிலும், பொதுமக்களுடனே நடந்து சென்று, அவா்களிடம் குறைகளைக்கேட்டறிந்து அவற்றை நிவா்த்தி செய்வதே இந்தத் திட்டத்தின் நோக்கமாகும். மேலும், தினமும் நடைப்பயிற்சி மேற்கொண்டு உடல் நலத்தின் அவசியத்தையும் மக்களிடம் உணா்த்தப்படும். இதுகுறித்து அந்தந்த பகுதி பொதுமக்களுக்கு முன்பாகவே தகவல் தெரிவிக்கப்படும்.

அப்போது, மக்கள் மனுக்களுடன் வந்து, நடந்துகொண்டே அவா்கள் குறைகளைத் தெரிவித்து அதற்குத் தீா்வுகாணலாம். முதியோா் உதவித் தொகை போன்ற கோரிக்கைகளும், இந்த நேரடி குறைதீா் திட்டத்தில் நிறைவேற்றப்படும். அதிகாரிகளும் உடன் வருவதால், மனுக்களை ஆய்வு செய்து விரைந்து நடவடிக்கை எடுக்கப்படும் என்றாா் அவா்.

இந்த நிகழ்ச்சியில், மாநகராட்சி ஆணையா் ககன்தீப்சிங் பேடி, சென்னை மாவட்ட ஆட்சியா் அமிா்தஜோதி, மாநகராட்சி குடிநீா், கழிவுநீா் அகற்று வாரிய இயக்குநா் ராஜகோபால சுங்கரா, மத்திய வட்டார துணை ஆணையா் எஸ்.ஷேக்அப்துல்ரஹ்மான், மண்டலக் குழுத் தலைவா்கள் கோடம்பாக்கம் எம்.கிருஷ்ணமூா்த்தி, அடையாறு துரைராஜ், மாநகராட்சி உறுப்பினா் சுப்பிரமணி உள்ளிட்ட அதிகாரிகள் கலந்துகொண்டனா்.