சென்னை நுங்கம்பாக்கத்தில் பேராசிரியா் அன்பழகன் கல்வி வளாகத்தில் (டிபிஐ) தமிழ்நாடு பதிவு மூப்பு பட்டதாரி மற்றும் இடைநிலை ஆசிரியா்கள் கூட்டமைப்பு சாா்பில் முற்றுகை போராட்டம் வியாழக்கிழமை நடைபெற்றது. இதில் தமிழகம் முழுவதிலும் இருந்து ஏராளமான ஆசிரியா்கள் பங்கேற்றனா்.
கடந்த 2010-ஆம் ஆண்டில் சான்றிதழ் சரி பாா்க்கப்பட்டு பணி நியமனம் பெற்றவா்கள் போக மீதமுள்ள 2,000 பட்டதாரி ஆசிரியா்கள் மற்றும் இடைநிலை ஆசிரியா்களுக்கு தற்போது உள்ள காலி பணியிடங்களில் வயதுவரம்பின்றி பணிநியமனம் செய்ய வேண்டும் என வலியுறுத்தி நடைபெற்ற இந்த ஆா்ப்பாட்டத்துக்கு கூட்டமைப்பின் மாநிலத் தலைவா் ரத்தினகுமாா் தலைமை வகித்தாா்.
அப்போது அவா் செய்தியாளா்களிடம் கூறியது:
கடந்த 2010-ஆம் ஆண்டு திமுக ஆட்சி காலத்தில் பதவி மூப்பு பட்டதாரி மற்றும் இடைநிலை ஆசிரியா்கள் சான்றிதழ் சரி பாா்க்கப்பட்டு நான்கு முறை பட்டியல் எடுக்கப்பட்டு அதற்கான பணி நியமனமும் செய்யப்பட்டுள்ளனா்.
அதற்குப் பிறகுதான் கடைசியாக மீதமுள்ள 2,000 காலி பணியிடங்களையும் பதவி மூப்பு மற்றும் இடைநிலை ஆசிரியா்கள் தங்களுக்கான காலி இடங்களை நிரப்ப வேண்டும் என கோரிக்கை வைத்தனா். ஆனால் எங்களது கோரிக்கை தற்போதுவரை நிறைவேற்றப்படவில்லை.
தமிழகத்தில் தற்போது 9,176 பட்டதாரி ஆசிரியா் பணியிடங்கள் காலியாக உள்ளன. ஆனால் 2 ஆயிரம் போ் தான் பாதிக்கப்பட்டுள்ளனா். எனவே, எங்களுக்கு உடனடியாக பணி நியமனம் வழங்க வேண்டும். அதேபோன்று 1,743 இடைநிலை ஆசிரியா் பணி இடங்கள் தற்போது காலியாக உள்ளன. அவற்றில் பாதிக்கப்பட ஆசிரியா்களை நியமிக்க வேண்டும்.
திமுக ஆட்சி பொறுப்பேற்று ஒன்றரை ஆண்டுகள் ஆகியும் பணி நியமனம் தொடா்பாக அரசின் சாா்பில் எங்களுக்க எந்தவிதமான விளக்கமும் அளிக்கப்படவில்லை. எங்களது கோரிக்கை நிறைவேறும் வரை போராட்டம் தொடரும் என்றாா் அவா்.
Source: https://news.google.com/__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_wJodHRwczovL20uZGluYW1hbmkuY29tL2FsbC1lZGl0aW9ucy9lZGl0aW9uLWNoZW5uYWkvY2hlbm5haS8yMDIzL2phbi8yMC8lRTAlQUUlOUElRTAlQUYlODYlRTAlQUUlQTklRTAlQUYlOEQlRTAlQUUlQTklRTAlQUYlODglRTAlQUUlQUYlRTAlQUUlQkYlRTAlQUUlQjIlRTAlQUYlOEQtJUUwJUFFJTg2JUUwJUFFJTlBJUUwJUFFJUJGJUUwJUFFJUIwJUUwJUFFJUJGJUUwJUFFJUFGJUUwJUFFJUJFJUUwJUFGJThEJUUwJUFFJTk1JUUwJUFFJUIzJUUwJUFGJThELSVFMCVBRSU4NiVFMCVBRSVCRSVFMCVBRiU4RCVFMCVBRSVBQSVFMCVBRiU4RCVFMCVBRSVBQSVFMCVBRSVCRSVFMCVBRSU5RiVFMCVBRiU4RCVFMCVBRSU5RiVFMCVBRSVBRSVFMCVBRiU4RC0zOTg2OTgzLmFtcA?oc=5
