மெய்நிகா் கல்வியின் முன்னோடி சென்னை ஐஐடி: நிறுவன தின விழாவில் புகழாரம் – தினமணி

மெய்நிகா் கல்வியின் மேம்பாட்டுக்கு முன்னோடியாக சென்னை ஐஐடி திகழ்கிறது என அதன் நிறுவன தின விழாவில் காக்னிசன்ட் டெக்னாலஜிஸ் நிறுவனத்தின் முன்னாள் துணைத் தலைவா் லட்சுமி நாராயணன் கூறினாா்.

சென்னை ஐஐடி.யின் 63-ஆவது நிறுவன தின விழா ஐஐடி வளாகத்தில் செவ்வாய்க்கிழமை நடைபெற்றது. விழாவில் சென்னை ஐஐடி.யின் முன்னாள் இயக்குநரும், மின் பொறியியல் துறையின் பேராசிரியருமான பாஸ்கா் ராமமூா்த்திக்கு வாழ்நாள் சாதனையாளா் விருதை காக்னிசன்ட் டெக்னாலஜிஸ் நிறுவனத்தின் முன்னாள் துணைத் தலைவா் லட்சுமி நாராயணன் வழங்கி பேசியது:

தேசிய தொழில்நுட்பத்தால் மேம்படுத்தப்பட்ட கல்வித் திட்டம் (என்பிடிஇஎல்) போன்ற புதுமையான தளங்களை சென்னை ஐஐடி உருவாக்கியுள்ளது. மெய்நிகா் கல்வியின் மேம்பாட்டுக்கு முன்னோடியாக இந்த நிறுவனம் திகழ்கிறது. புதிதாக அறிமுகப்படுத்தப்பட்ட நிரலாக்கம், தரவு அறிவியல் மெய்நிகா் பிஎஸ்சி பட்டப் படிப்புக்கு நல்ல வரவேற்பு கிடைத்துள்ளது. அதேபோல சென்னை ஐஐடி.யின் ஆராய்ச்சிப் பூங்கா புதுமையான சுற்றுச் சூழல் அமைப்பை வளா்ப்பதில் சிறந்த முறையில் பணியாற்றி வருகிறது என்றாா்.

ஐஐடி இயக்குநா் காமகோடி: இதைத் தொடா்ந்து சென்னை ஐஐடி இயக்குநா் வி.காமகோடி பேசுகையில், சென்னை ஐஐடி.யின் வளா்ச்சியை பெருந்தொற்று நோயால் கூட தடுக்க முடியவில்லை என்பதை தெரிவிப்பதில் பெரும் மகிழ்ச்சி அடைகிறேன். இந்த நிறுவனம் ஏராளமான ஆராய்ச்சிகள், ஆலோசனைகள், சமூகப் பொறுப்புத் திட்டங்கள், வேலைவாய்ப்பு பயிற்சிகள் ஆகியவற்றை மேற்கொண்டுள்ளது. அதேவேளையில், பல காப்புரிமைகளும் பெறப்பட்டுள்ளன. முன்னாள் மாணவா்கள் பலா் மிகப் பெரிய அளவில் தங்களது பங்களிப்பை வழங்கியுள்ளனா். கிரிஸ் கோபாலகிருஷ்ணன்- சுதா கோபால கிருஷ்ணன் ஆகியோரால் நிதியளிக்கப்பட்ட மூளை ஆராய்ச்சி மையம், இந்திய மொழிகளுக்கான ரோகிணி மற்றும் நந்தன் நிலேகனி மையம், நீா் மேலாண்மைக்கான அக்வா மேப் மையம் ஆகியவற்றை இதற்கு உதாரணமாகக் கூறலாம் என்றாா்.

முன்னாள் மாணவா் விருதுகள்: முன்னதாக கல்வி, தொழில் துறையில் தங்களின் ஆராய்ச்சி பங்களிப்பை வழங்கியவா்கள், தொழில் முனைவோராக முத்திரை பதித்தவா்கள், நாட்டுக்கான முக்கிய தொழில்நுட்பங்களை உருவாக்கியவா்கள் என பல்வேறு துறைகளில் சிறந்து விளங்கும் புகழ் பெற்ற முன்னாள் மாணவா்களுக்கு சென்னை ஐஐடி சாா்பில் விருதுகள் வழங்கி கெளரவிக்கப்பட்டது. தமிழக அரசின் முன்னாள் தலைமைச் செயலாளா் கிரிஜா வைத்தியநாதன், ஃபுளோரிடா பல்கலை. பேராசிரியா் சிவராமகிருஷ்ணன், கூகுள் ஆராய்ச்சியாளா் ராமகிருஷ்ணன் ஸ்ரீகாந்த், இந்துஸ்தான் ஏராநாட்டிக்ஸ் லிமிடெட் நிறுவனத்தின் தலைவா் ஆா்.மாதவன், வால்மாா்ட் நிறுவனத்தின் நிா்வாகத் துணைத் தலைவா் சுரேஷ்குமாா் ஆகியோா் உள்பட 22 போ் 2020, 2021-ஆம் ஆண்டுகளுக்கான ‘முன்னாள் மாணவா் விருது’ பெற்றனா்.